Skip to Content

Valentine’s Day: Ralring tein um mu, voikhat diriamhnak nih na nunchung belnang an neh sual lai

Valentine’s Day: Ralring tein um mu, voikhat diriamhnak nih na nunchung belnang an neh sual lai

Be First!
by February 10, 2019 Chin, Home

Laimi chung zong ah Valentine’s Day (ခ်စ္သူမ်ားေန႔) timi nih Lai nungak, tlangval nun ah faktuk in rian a ttuan ve cang. Valentine’s Day ah dawtmi he lengchuah, hmun nuam le restaurant ttha ah kal ve ding tiah phung bantuk in ser mi ah a ruah mi Laimi chung in tampi um dawh kan si. Valentine’s Day ah dawt mi he lennak, ton lennak hmanthlak tar rumro a hmang mi zong kan um. A ngaingai ti ahcun na dawtmi tlangval he Valentine’s Day leng na chuahnak hmanthlak na tar bak in micheu khat nih cun “E a thianghlim ti lo” tiah an lungkil in an i ruahdamh cang.

Cu caah ka nau nu a tangle bia hna hi na ralrin awk ah kan rak cah duh:

Chikhat te nuamhnak, diriamhnak men ah caan saupi na kilven mi, him tein na chiah ko mi na thianhlimhnak kha a rawk cikcek kho timi na theih a herh. Thianhlimnak timi hi nu pakhat caah a sunglawi tuk mi a si bantuk in thilri bantuk in a cuaithlai men awk a ttha lomi, a sunglawi ngai ngai mi a si.

Nitlak ram nunphung na uar tuk sual ahcun cu na uarmi sining nih zungzal tahnak an phorh khawh timi na theih chih zong a herh.

Thilri, thilthuam cu a hnawmh zong ah thiang tein suk tthan, ttawl tthan khawh a si, a si nain na thianhlimnak cu voikhat na hrawh sual ahcun zeibantuk chaphiat hmanh nih a thian ter kho ti lo i olive chiti in ttawl tthan lengmang zong ah san a tlai kho ti lo, a mah ning tein a chia tthan kho ti lai lo.

Nu pakhat cu zeitluk hmanh in i dawh seh, mifim cathiam le mirum fanu pi zong va si ko seh, a sinak a hman thiam lo, nunning ziaza ah zero a si ahcun a mahnak in a thianhlim mi sifak nute kha nu sinak ah man a ngei deuh ko ti zong theih a hau.

Mipi nih an tuah cio ti men ruang ah Valentine’s Day ka hmang ve lai ti zong hi a ttha lo, Valentine’s Day hmannak hmanthlak tar len khi ka thianhlimnak ka zuar cang tiah mah le mah mualpho he aa khat timi zong rak thei tiah kan duh.

Cu caah a donghnak bik bia kan cah duh mi cu “Ka nau nu fak pi in khua rak ruat law ralring tein um rak i zuam. Chocolate voikhat danghnak men le chikhat diriamnak men ruang ah na thianhlimnak kha zuar rak tim hlah, hlen aa zumh mi rak si hlah law, chikhat diriamnak le nuamhnak men nak in zungzal nuamhnak ca tu ah ralttha tein rak um deuh” tiah kan cah duh.

Siaherhnak he

Na dawtmi na U,

Cing Te

Previous
Next

Leave a Reply

Your email address will not be published. Required fields are marked *

*