Skip to Content

Na Nu Pawchung in chuak loin rak um law a ttha deuh

Na Nu Pawchung in chuak loin rak um law a ttha deuh

Be First!
by February 12, 2019 Chin, Home

Pathian cu cuaitlai hmangmi Pathian a si. Vawlei cung minung hi mi tlingmi kan um lo. Asinain cuai a thlai tthiam. Belshazzar cu Pathian nih cuai a thlai i cuaitlainak ah a tling lo. Judas zong hi cuaithlainak ah a tling ve lo. Palhnak pakhat na tuahmi ruang lawng ah khan Pathian nih a donghnak in bia an chat lo. Pathian duhmi thil dang na tuahmi a um maw ti kha Pathian nih a zoh ve. Judas hi vun zoh hmanh!

  1. Judas Iscariot cu mifir a si.

Baibal nih mifir a si a ti (John 12: 6). Fir buin Khrih hnu zulh hi ttih a nung ngaingai mi a si. Nang le kei teh Pathian kan zum, Jesuh cawnpiaknak kan zul kan ti ttung i, kan fir pah ve sual hnga maw? Ttih a nung ngaingai.

  1. Jesuh kum thum chung a zulh ko nain Jesuh Khrih nunning le lungput kha ai cawnmi pakhat hmanh a um lo.

Jesuh bak kum thum chung pumpak in vun zulh ahcun Judas hi a sining, a nunning le a lungput hi Jesuh bantuk asi ding khi a si. Jesuh a hmu bal lomi hmanh nih Jesuh kan zumh ahcun Jesuh hi Judas nih a theihfian taktak ding khi a si. Asinain a nunnak ah Khrih nun pakhat hmanh a langhnak a um lo. Jesuh nunning le lungput ngei loin Jesuh hnu ka zul ai ti ve mi Khrihfa hna kan si ve sual maw?

  1. Mary nih Jesuh ke i chiti rimhmui a thuh ahkhan a paam tuk a ti.

Khrih ca i thil ttha amah nih a tuah lo hlei ah mi dang nih an tuahmi zong kha a paam tuk in a ruah. Khrih cungah dawtnak a ngei lo. Khrih caah thil ttha tuah ai tim lo. Khrih ca i thil ttha a tuahmi mi dang zong kha a lomhpi hna lo. Nang le kei zong kanmah le kan inchungkhar ca lawng i zeipoh a kawl i Jesuh ca i zeihmanh a siang lomi kan si ve sual maw? Jesuh caah thawhbur, thazaang, caan a pe kho lomi kan si ve sual maw?

  1. Amah luatnak ca asi poh ahcun midang zeibantuk dirhmun an phanh zong kha a poi a ti lo mi a si.

Judas nihcun Jesuh hi an tlaih te lai i a zultu zong hi an kan tlaih dih te lai ti kha a hngalh. Cucaah Jesuh umnak hmun cu a chimh hna. Cutikah amah cu luatnak an peek hlei ah laksawng zong phaisa in an peek chih. Jesuh leirawi hi a poi ah a chia lomi a si. Nang le kei Jesuh hi voizeidat dah kan rawi ve cang? Jesuh hmang in pumpaak hlep nak zeizatdah kan hmuh ve cang?

  1. Jesuh rawhral nak caah fakpiin a cawlcang tu a si.

Judas nih Jesuh a leirawi ruangah Jesuh cu an tlaih i a thih caah khamhnak kan hmuh cu a si ko nain, Judas nihhin vawlei cung minung hi a kan dawt caah Jesuh nih rak kan khmah seh timi thinlungput in Jesuh hi a zuarmi a si lo. Amah pumpaak luat duh le him duhnak caah Jesuh kha a zuarmi a si.

  1. Jesuh a daw lo nain a daw ngaimi ai lawh ter tu, mi depde a si.

Judas cu Rome ralkap le Judah upa hna he Jesuh umnak ahcun an va kal tikah Judas nihcun Jesuh cu a hnamh. Dawt hnam bak in a hnamh. Asinain, a dawt caah si lo. Mi depde asi caah ai hnamh termi a si. Jesuh nih a huat bikmi hna lakah mi depde an i tel ve. Farasi pawl zong hi an depdet caah Jesuh nih a huat tuk hna nak a si. Zumtu mi depde hna kan si ve sual maw?

  1. Mah le mah ai that mi a si.

Jesuh thi hmasa seh ti a duhtu Judas cu Jesuh hlan ah a thi. Amah le amah ai awk i a thi. Mah le mah i thah hi lainawn a si. Pathian huat taktakmi a si. Kan Laimi zong Judas bantukin ai awkmi nan karh chin lengmang. Mah le mah ai awkmi pawl hi a tu khawikadah an thlarau an um hnga tiah na n ruah cio hna?

Judas cu Baibal i a ummi a tuanbia vialte ahhin Pathian duhning in a umnak zawn pakhat hmanh kan hmu lo. Cucaah pathian a simi Jesuh nihcun hi pa hi cu a nu paw chung in chuak lo tein rak um selaw a ttha deuh hnga a ti nak a si. Zeicatiah Judas zungzal in khua a sak nak hmun hi Jesuh nih a theih. Nang zong hi Hell ram i zungzal um ding na si sual ahcun na nu paw chung in chuak lo tein rak um law a tthe deuh ve hnga? nangmah nihcun van kai ding cun nai ruah ko lai. Asinain Pathian nihcun Baibal ning lawng in bia a ceih lai.

Credit: Dr. Aung Myint Thang

Previous
Next

Leave a Reply

Your email address will not be published. Required fields are marked *

*