Skip to Content

Salai Za Thawng nih “Tum Tum” sin ah cakuat a tial tthan, A biafang a faifim ngai

Salai Za Thawng nih “Tum Tum” sin ah cakuat a tial tthan, A biafang a faifim ngai

Be First!
by March 14, 2019 Chin, Home

To “Tum Tum”

Mifim an fim dih lo an ti bangin tutan Australia sianginn kainak kongkau ah hmundang ummi nih thil theih bik bantukin ca na ttial hmuh tikah ka lau ngai. Mi nih chimhnak in thil hi i tlaih nakin mah nih tonmi thil hi a hman deuh ti hi theih law a ttha. Australia ummi Laimi hi mihrut an silo caah thil sining an kherhlai tuk ve mi a si. Sianginn kai ding phan mi zong kan thu sawh lo. Kan tonmi thil kongah kan si khawh tawkin kan kherhlai. Hi kongah hin zang tuk in biachimh ti lo dingin ka duh. Theihnak zongah a nuam lo ngai ko cang. Mirum hna nih cun sianginn man liampiak kho ding ahcun a har lem lo. Nain phaisa cawi in kumkhat ah cham dih than dingin biatiamnak he a kal mi caah ngaichihnak a tam lai.

PR Soknak Kongah

PR soknak caah a tlangpi in 10 tlinh a hauhmi a um i cucu kanmah pawl nih tlinh khawhnak lam hi 100 ah 10 lawng a si. Cucaah PR soknak kongkau ah ruahchannak pek sual ahcun tlam a tlin lo tikah lung a fak ngai lai.Asylum seeker sawk cu mual i pho chinnak a cang lai tiah kan ttih ngaimi a si. PR sawk belte cu a fawi bak na chim bantukin nain PR hmuh kha a har mi cu a si ko.

Sianginn Kongah

Sianginn hi Institute an si i Vocational Education and Training Sector an si hna. Cawnmi pawl cu rawlchum(Cookery) Hospitality(Khual zohkhenhning le rawlchum le lakphakti serning) Early Childcare( hngakchia zohkhenhning) Automative(mawtaw remh) pawl hi an si. Cucu kumhnih ah $18300 si i Ks.ting 200 tluk a dihmi a si. Kalnak he cun ting 350 tluk deng dihmi a si. University ah kaiding ah cun listening 6.5, peaking 6.5, writing 6.5 a si caah zapi zaaran nih an hmuh khawh lomi a si caah a har tukmi khi a si. Mirang holh kan thiam lo tik cun scholarship zong hmuh khawhnak lam um lo.

Nupa/va ngeih Kongah

Laipa caah lainu, Lainu caah Laipa na van ti dan ah ka uar ngai nain nupi/va ngeih hi fawi tukin kan ruah sual ahcun hngahttah kan karh lai. Lentecelh a silo caah ruah ciammam in nupi tthit/ va ngeih hau mi a si. Australia ah laimi tam tuk nungak/ tlangval an um ko caah lainu caah laipa, laipa caah lainu cu an si kho hrim ko. Tu phan mi cu keimah telh in muisam lei tlamtling lo ngai kan si hna tikah a fawi lo heee(Capo).

Rian Kongah

Tu a phan mi lakah thathu bik hi keimah ti ninglaw ka palh lai lo. Nain riantuan lo awk tthat lo caah ttuan khawh tawkin ka ttuan. Zei rian hmanh nautat mi kan ngei bak lo. Kan thathu hrim lo caah zei kip rian kan ttuan kho tulio ah cun mu. Kan ei man le kan sianginn man le kan ratnak leiba kong ruahah riantuan loin um khawh a silo caah thathut lo le nautat mi ngeilo tein rian kan ttuan. Cu hmanh cu Laimi phun chungin Pathian nih thluahchuah a pekmi Jacob nih dawtnak le zawnruahnak tak tak he a kan ttuanter. Cheukhat hna cu Company hna an fuh hna i an documents an hal hna tikah zarhkhat ah sml 20 lawng si caah part time kan duhlo tiah an ti hna. Cu lakah nu ca ko ah rian hi a har deuh rih. Cheukhat sianginn ah cun zarhkhat ah ni 5 hna an kai caah riantuan duh zongah tuan khawh loin zarhkhat chung sianginn ah mirang ca an cawng. Cheukhat cu nithum an cawng i nihnih hi rian an ttuan ve. Cheukhat sianginn cu zan ah kai khawh mi a um caah zan kaimi um a si. Cucaah na theithiam dingah cun an thathu lo i nautat mi an ngei lo ti kha kan theihpi law kan duh.

 Income kongah

Income na tuaktanning hi kan mitthi ngai ko. Kha zat cu hmu kho u sihlaw kan i lawm tuk hnga ta. Nain a lam um lo. Phaisa hmuhmi khawn a harnak cu ei man le herhmi pekding le sianginn course pipa kai tikah thlakhat ah 800 tlukin pek colh si lai caah khawn cu chinh hlah cawi tu a hau mi kan um te lai. Chimh a fawi tlukin a tak ah a fawi tawn lomi hi a poinak cu a si ko. Suikhur cawh bantuk a si na timi zawnte ah hin cun suikhur cawh in sui um lo bantuk khi a si.

Australia a phan cang mi hna nih nahchuahnak an ngeih caah ra hlah uh tiah ziarngeinak in an kham hna ti lungput an kan ngeiter dih cang. An rat le rat lo kongah zei tal hmanh sungzatlaknak le thathnemnak a um lo. Nain a ra dingmi nih a harnak hmun in rethei tuar in riantuan ding a si i hnek a hau ko timi lungput ngei hna seh ti kha ka duh. Minung hi ttanh caan le ttanh ningcang a um. A kong theihnak(theory) men men nakin practical in a tongmi hi zumh le ttanh deuh nak caan zong a um awk a si.

Mihrut timi hi holh thiam lomi pawl khi an si lem lo. Holh thiam ko tung i mifim bik ah i ruah in theihnak sawh in fakpi in thih ngamh in dirhpi khi hruh pakhat a si ve keimah le. . . . bantuk hi.

Note: Salai Za Thawng nih a tial ning tein kan lak chin, Spelling pakhat zong kan remh lo pin ah a min tial ning zong kan remh piak lo.

Previous
Next

Leave a Reply

Your email address will not be published. Required fields are marked *

*